“कमटेकमा ब्रोडब्याण्ड ईन्टरनेटलाई प्राथमिकतामा राखेका छौं”– बिश्वराम बलामी (महासचिव, क्यान महासंघ)

काठमाडौँ  ।  कम्प्युटर एशोसिएशन नेपाल महासंघ (क्यान महासंघ) ले आगामी भदौ २३ गतेदेखि ‘क्यान कमटेक २०१६’ प्रदर्शनी आयोजना गर्न लागेको छ । प्रबिधिको पछिल्लो संस्करणका बारेमा जानकारी दिन र प्रबिधिजन्य सबै उत्पादनहरु एकै छानामूनि उपलब्ध गराउने उद्देश्यले राजधानीको भृकुटीमण्डपमा क्यान कमटेक आयोजना गर्न लागेको हो  ।

bishw2

विगतमा क्यान ईन्फोटेक र क्यान सफ्टटेक आयोजना गर्दै आएको महासंघले पहिलो पटक क्यान कमटेक आयोजना गर्न लागेको हो । त्यसैले पनि कमटेकको बारेमा चौतर्फी जिज्ञासा बढ्दो छ । क्यान कमटेकको तयारी, आवश्यकता र महत्वका साथै नेपालमा सूचना प्रविधि क्षेत्रको विकासमा क्यान महासंघले खेल्ने भूमिकाका वारेमा महासंघका महासचिव बिश्वराम बलामीसँग गरिएको कुराकानीको सम्पादित अंश ।

क्यान महासंघले क्यान ईन्फोटेक र क्यान सफ्टटेक गर्दै आईरहेको थियो । अब यो क्यान कमटेकको आवश्यकता चाँही किन ?

तपाईको कुरा एकदम सही हो । क्यान महासंघले विगतदेखि नै क्यान ईन्फोटेक र क्यान सफ्टटेक आयोजना गर्दै आएको छ । तर समय अनुसार प्रविधिको विकास र विस्तारका लागि हामीले यो नयाँ प्रदर्शनी आयोजना गर्न लागेका हौं । यसको मतलब क्यान इन्फोटेक र सफ्टटेक नहुने होईन । यी सबै प्रदर्शनीहरु नियमित रुपमा जारी रहन्छ ।

क्यान ईन्फोटेक र क्यान कमटेकमा फरक चाँही के त ?

क्यान इन्फोटेक सवै प्रविधिजन्य उत्पादन तथा सेवाहरुको कुम्भमेला हो भने क्यान कमटेक चाँही विशेष गरी ईन्टरनेटहरुको कुम्भमेला हो । यसो भन्दैमा इन्टरनेटहरुको मात्रै भन्ने होईन । कमटेकमा पनि प्रविधिका सवै स्टलहरु हुनेछन् । कमटेकमा विशेष गरी ब्रोडब्याण्ड ईन्टरनेट र कम्प्युनिकेशन टेक्नोलोजीलाई प्राथमिकतामा राखेका छौं ।

नेपालमा ब्रोडब्याण्ड ईन्टरनेटको अवस्था कस्तो छ ?

पछिल्लो समय नेपालमा पनि ब्रोडब्याण्ड ईन्टरनेटको माग र आकर्षण बढ्दो छ । नेपाल टेलिकमले पनि पछिल्लो समय ब्रोडब्याण्ड ईन्टरनेटलाई जोड दिएको छ । बिश्वमा ब्रोडब्याण्ड ईन्टरनेटको तिव्रतर माग भईरहेको परिप्रेक्ष्यमा नेपालमा पनि यसको विस्तार गर्न आवश्यक देखेर नै कमटेकमा विशेषरुपमा यसलाई प्राथमिकतामा राखिएको हो ।

प्रदर्शनीको तयारी कस्तो छ ?

हामीले अवलोकनकर्ता र स्टल राख्ने सबैलाई सक्दो सुविधा दिने किसिमले तयारी गरेका छौं । प्रदर्शनीलाई सभ्य, भब्य र ब्यवस्थित बनाउने तयारीका साथ हामी जुटिरहेका छौ ।

कमटेकमा कति स्टल रहने छन ?

क्यान कमटेकमा साना ठूला गरि ८१ वटा स्टल रहने छन् । सेक्यूरिटी सोलुशन्स कम्पनीहरुका लागि छुट्टै ठाउँको व्यवस्था गरेका छौं । त्यो प्रिभिलियनमा इलेक्टिोनिक सेक्यूरिटी तथा सेफ्टी सोलुसन्सका उपकरणहरु हुनेछन । जस्तै सिसिटिभी, एक्सेस कन्ट्रोल सिष्टम, सेन्सर र अलार्म, एटेन्टेन्स, फायर डिटेक्टर इत्यादि रहनेछन ।

अवलोकनकर्ताहरुलाई के कस्तो सुविधा छ ?

अवलोकनकर्ताहरुले निर्धक्क भएर प्रदर्शनीको अवलोकन गर्न सक्नु हुन्छ । हामीले सुरक्षाको राम्रो व्यवस्था गरेका छौ । स्टलहरु अवलोकनका लागि पनि उचित किसिमको प्रवन्ध मिलाएका छौ । सर्वसाधारणहरुलाई प्रवेश शुल्क ५० रुपैंया र विद्यार्थीहरुलाई २५ रुपैंया तोकेका छौ । साथै कलेज तथा स्कुलका विद्यार्थीहरु सम्बन्धित कलेज तथा स्कुलको पत्रसहित आएमा टिकट दरमा छुटको व्यवस्था गरेका छौ । सर्वसाधारणहरुले सबै किसिमका जानकारी एकै स्थानबाट सजिलै प्राप्त होस भनेर त्यही अनुसारको व्यवस्थापन गरेका छौ ।

कमटेकमा आउनेहरुले के कस्तो प्रविधिहरु बारेमा जान्न र किन्न पाउने छन ?

कमटेकमा प्रविधिजन्य सवै सामाग्रीहरु उपलब्ध हुनेछ । ईन्टरनेट सेवा प्रदायक, टेलिकम्युनिकेशन्स्, इलेक्टोनिक्स, सेप्mटी एण्ड सोलुसन्स, हार्डवेयर सेल्स तथा मेन्टीनेन्स्, पावर सोलुसन्स्, मोवाईल एसेसोरिज, डिलर र डिस्ट्रिव्युटर्स, आईसीटी कलेज तथा ट्रेनिङ्ग ईन्स्टिच्युटस्, पेमेन्ट सोलुसन्स् लगायतका स्टलहरु रहनेछन्् । सरकारले परिकल्पना गरेको स्मार्ट सिटीको आधारभुत पूर्वाधार सम्बन्धी जानकारी यस प्रदर्शनीमा उपलब्ध हुने छ । ब्रोडब्याण्ड ईन्टरनेट सेवा प्रदायक कम्पनीहरुले विशेष सहुलियतसहितका प्याकेजहरु सार्वजनिक गर्दैछन् ।

नेपालमा सूचना प्रविधिको विकासका लागि क्यान महासंघले के कस्तो कामहरु गर्दै आईरहेको छ ?

क्यान महासंघले विगत २४ वर्षदेखि सूचना प्रविधि क्षेत्रको विकासका लागि काम गरिरहेको छ । विभिन्न सेमिनार, कार्यशाला, गोष्ठि, अन्तरक्रियाका साथै क्यान ईन्फोटेक, क्यान सफ्टेक, कन्फेरेन्सहरु आयोजना गर्दै आएको छ । साथै नेपालमा सूचना प्रविधिको विकासका लागि अन्तराष्ट्रिय समुदायहरुसँग समन्वय गरी विभिन्न कार्यक्रमहरु समेत आयोजना गर्दै आएको छ । प्रविधि क्षेत्रको विकासका लागि सरकारसँग सहकार्य गरी अघि बढीरहेको छ ।

नेपालमा सूचना प्रविधिको तिव्रतर विकासका लागि के गर्नु पर्ला ?

नेपालमा अहिले जे जति मात्रामा प्रविधिको विकास भएको छ । त्यसमा निजी क्षेत्रको भूमिका महत्वपूर्ण छ । सरकारले निजी क्षेत्रलाई प्रोत्साहन गर्ने खालका नीतिहरु ल्याएर कार्यक्रमहरु अघि बढाउन सके नेपालमा प्रविधि क्षेत्रले फड्को मार्न सक्थ्यो । प्रविधिको विकास र विस्तार भनेकै समग्र मुलुकको विकास हो ।