शहीद (कबिता)

(लक्ष्मण गाम्नाङ्गे)

पुलिसको नाम सुन्दै सुराल बिगार्ने
छेरानन्द पनि शहीद भए
प्रजातन्त्र सम्झिदै दाह्रा किट्ने
पन्चानन्द पनि शहीद भए
छेपारीकान्त भाग्दा भाग्दै
डडाल्नामा गोली लागेर शहीद भए
कटुवालकाका आन्दोलन दबाउन
खल्तीमा ‘भाडा’ बोकेकोबोक्यै शहीद भए
जोशी गुरू खटप्वालबाट चियाएर
आन्दोलनको रमाइलो हेर्दाहेर्दै शहीद भए
फलानो पार्टीका कार्यकर्ता
हनुमानभक्त काजी
अंशवण्डाको लडाइँमा
आफ्नै भाइलाई मार्न नसक्ता शहीद भए
ढिस्कानो पार्टीका केन्द्रीय नेता
कामेन्द्र कुमारलाई
छिमेकी महिलासँग सुतिरहेकै अवस्थामा
उनका लोग्नेले दुईटुक्रा पार्दा शहीद भए
यस्ता चित्रविचित्रका शहीदहरूको हुलमा
अल्पमतमा परेर
थिचिएर
किचिएर
गंगालाल र रत्न वान्तवाहरूले
भीमदत्त र सरोज कोइरालाहरूले
गुहार ! गुहार !! भन्दै चिच्याएको सुनेर
मेरो निन्द्रा अचानक भङ्ग भयो
के तपाईँले पनि त्यो चित्कार सुन्नुभयो ?